09
01.2018

【放電一流】SUPERPARK HONG KONG

親子育兒(旅遊)  

來自芬蘭嘅SUPERPARK,實在係久仰大名!多得同學仔生日會嘅邀請,終於可以一嘗傳說中老中青都啱玩嘅室內親子遊樂場,好興奮呀!去Playhouse就去得多,但今次似乎同以往去過嘅大不相同,馬上去探過究竟囉!
SUPERPARK位於奧運站嘅一號銀海,佔地四萬五千呎,可以想像得到超大嘅玩樂空間!*o*


馬上要動起來,are you READY???


生日會已包括每位來賓嘅入場費同防滑襪,襪嘅質地好厚料,凸起嘅防滑部份做得好啜地。入場一定要著襪,而一般客人入場費係冇包防滑襪嘅!有需要可即場購買$15/對,有齊大人同小朋友size,咁高質,值得買呀!


每人都會獲發一條手帶,手帶嘅用途除咗for入場之外,亦可用嚟開locker㗎!


只要有手帶都可以使用locker,無須租金或按金。換句話說,我哋一家四口可以用4個locker,夠晒用啦!


「DO」一「DO」就可以入場,同搭地鐵一樣呀!XD


一入場就見到呢個大草披,晴朗二話不說已經爬咗上去喇!


草地上設有滑梯同攀爬設施,十足十一個小山坡咁呀!


晴朗不斷來回上上落落,上嘅時候就會發現防滑襪嘅強大功能喇!


響呢度都可以玩滑草啦!We~~~


一半滑梯一半草地咁瀡落去係點嘅感覺呢?自創新玩法好過癮!


朗朗又施展摛梯大法,雖然呢條梯長過屋企碌架床果條好多,但一樣難佢唔到~


晴晴都嘗試挑戰攀石牆,好快就爬咗上去喇!不過往往識上唔識落,唯有急call爸爸求救啦!~.~


每逢有啲疑似積木嘅嘢!朗朗一定唔會放過。小心!快將倒下~ @o@


朗朗搭建嘅搖搖板就益咗晴晴同朋友仔大玩特玩喇!


原來每個小朋友玩波波池嘅笑容都係一樣㗎!^o^


一跳上飛索就高速滑下,好刺激呀!


朗朗提議到攀爬架玩樂,去囉去囉!


呢部彈珠機好大部,而且係全人手推動㗎!


冇任何技術可言,全憑運氣!朗朗竟然高分過我,我要上訴呀!


攀爬架由幾層組成,有唔同嘅機關同障礙,就好似走咗入迷宮一樣。初時都仲可以用眼去跟蹤住晴朗,但佢哋爬咗去另一邊嘅時候,已經失去聯絡。大鑊!@.@


原來另一端有條長長嘅紫色大滑梯,一直期待佢哋會響滑梯出番嚟!但等咗好耐都唔見...

企咗一陣終於見番晴朗,緊張嘅心情終於放鬆落嚟!地方大真係好易走失㗎!@@'''


呢度啲遊樂設施都好大型,就好似呢個保齡球遊戲咁!要將波大力拋去遠處先能夠入洞~


晴朗用盡九牛二虎之力都....冇一球中,唯有幫下佢哋入球啦!XD

玩到呢個時候,聽到同學仔嘅生日廣播,到party房集合囉!


生日會即將開始!既期待又興奮!


party房擺放咗3張長枱,空間感好足夠,小朋友跑跑跳跳都冇問題啦!


玩到攰又可以坐低抖抖,地方好唔錯喎!


牆身已經可以當作back drop,主人家已經為生日會做好簡單佈置喇!


仲整埋生日相框,對囡囡嘅生日會安排得無微不至,好細心!


小朋友淨係拋氣球已經玩咗好耐,乜咁樣真係好好玩咩?^^'''


為壽星女送上生日禮物係指定動作啦!cheers~


唱生日歌、切蛋糕將生日會嘅氣氛推到去最高峯,大人同小朋友情緒都好高漲呀!


食過茶點同生日蛋糕後,又係時候繼續去玩囉!gogogo~


呢條要坐住車軚咁瀡落嚟嘅滑梯係必玩推介!拉住個車軚行上斜路嘅時候,又一次發揮咗防滑襪嘅功效。行到上去等待果陣,心跳加速到有一刻想拗底落番去,但唔玩過又點叫做嚟過呀?所以硬著頭皮,死就死啦!瀡落去果下忍唔住大叫咗出嚟!咁樣似乎有效減低莫名嘅恐懼感。速度好快!去到彎位果下係最驚,瞬間已經落到嚟地面。真係好刺激!朗朗落到嚟係呆咗㗎!呆到職員問咗佢幾次先識得企番起身,好搞笑!XD


我哋玩刺激嘢嘅時間,晴晴就去咗玩體操。唔好睇幾件大形積木好簡單咁!其實要跨過去都好考體力㗎!


職員會在旁協助,亦會隔一陣又換過唔同嘅積木同位置,不斷有新玩法~


完成所有障礙之後,一躍而下,又幾有姿勢喎!晴晴玩咗好多次,每次完成都好興奮咁話我知佢做得到,好有滿足感呀!


一向覺得打golf係有錢人嘅玩意,冇諗過有機會一試,但姿勢有待改善。^^''' 我見到之前有個小朋友棒棒都中,仲要打得好高同力度十足,晴朗媽媽真係佩服得五體投地呀!


大型遊戲又點只保齡球丫?晴晴同爸爸就努力打梗籃球喇!一分鐘限時內,要盡量入晒所有籃先攞到高分㗎!


玩完藍球,不如玩下足球囉!睇下邊個腳法好啲先~ XD


呢部機要跟住電腦指示踩啱唔同踏板,玩法類似跳舞機咁!好受小朋友歡迎!


四碌單車條龍應該係咁多個遊戲之中最長,咁多人都想玩,一定有佢嘅吸引之處~


晴朗都加入賽事喇!我哋完全未接觸過呢款車,唔知駕駛會唔會有問題呢?


朗朗平時冇踩單車嘅習慣,但坐到上去都揸得幾輕鬆喎!


但晴晴就欠咗啲腳力,要爸爸幫忙推車至得呀!^^'''


玩完車車,晴晴提議去跳彈床,朗朗同埋朋友仔都舉腳讚成呀!


每次運動嘅時候,身體就會自然變得好high,越玩越hyper~


晴晴勁鍾意跳彈床,跳完一次又一次,玩到成頭汗都仲想encore呀!


場地真係無敵大,大到可以放得落一個滑板場,認真堅!


入去玩嘅多數後生仔女,有技術嘅又有,完全未玩過嘅都有。只要夠膽量,就可以一試啦!

SUPERPARK地方大又多嘢玩,好多仲加入咗運動元素,真係少啲體力都唔得呀!啱晒平日少做運動嘅香港人啦!不過地方太大喇!小朋友好易走失,隔一陣又會聽到父母搵小朋友,又或者小朋友搵大人嘅廣播。我都同晴朗失散過好多次,不過晴朗都只係響場來四圍走、四圍玩,都算安全嘅!只要深信玩玩下會撞得番就冇問題!如果細啲嘅小朋友就唔建議上去大型攀爬架喇!因為一旦上咗去,真係比較難捉番佢哋落嚟!而且多大個嘅小朋友玩,有時玩到癲可能會唔小心整親其他細嘅小朋友都唔奇,所以要加倍小心!如果抱住畀小朋友放電嘅心態,呢個場都算唔錯!一個看似簡單嘅體操區,晴晴都玩咗好耐!原來遊玩設施唔需要好複雜,簡簡單單已經好好玩。不過如果話呢個場好好玩又未至於,因為好多嘢都唔啱晴朗玩咁!太細嘅小朋友都未必啱!好多都要5歲至玩得。我反而覺得個場比較適合情侶或一大班年青人去聯誼玩樂。未去過嘅朋友,都值得去體驗一次嘅!記得預早book定位喎!我哋去果日一早已經棟咗個全日full house牌出嚟喇!小朋友唔會同其他場作比較,所以一定玩得好開心!放電係一流㗎!但坦白講,去一次都足夠喇!以呢個價錢,可以有更多更好嘅選擇啦!

精華片段:


SUPERPARK HONG KONG
一日門票:
平日:HK$180
周末、公眾假期及學校假期:HK$240
(大小同價,3歲或以下無須入場費)
地址:九龍奧運站一號銀海地下
網址:http://www.superpark.com.hk
facebook:https://www.facebook.com/superparkhk


FIND US on:
  "  "   

BLOGs:

 

CONTACT US:

發表於2018.1.09
留言(0)
博客名稱 :
晴朗媽媽
網誌名稱:
晴朗天 - 食·玩·育·美·愛の親子平台
使用天數:883
年齡:2
電郵:chinglongtin@gmail.com
按月份瀏覽
    2018
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
    2017
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 生活品味
  • 電影戲劇
  • 攝影寫真
  • 其他
  • 財經生活