24
04.2018

【紫醉波波世界】齊賀母親節@大樹先生的家 Mr. Tree - 香港店

親子育兒(吃喝)  

春天到,花兒開,大家會聯想到啲咩呢?每年一到呢個時候,感覺好快又到母親節喇!自己嘅節日喎!梗係特別上心啦!大家預備好去邊度慶祝未呀?計我話最緊要有嘢啱小朋友玩,咁大人就肯定有安樂茶飯食啦!大樹先生一向都係親子玩樂嘅好地方,呢樣係人都知啦!換上紫色無敵波波池嘅大樹先生頓時瀰漫住一份溫馨浪漫嘅氣氛,媽媽們一定會鍾意,一齊去睇真啲囉!


嘩!晴朗到達大樹先生門口嘅時候,發現波波池變咗紫色,顯得十分雀躍。晴晴直情塞埋個頭入去睇,好期待入去咁呀!XD


紫色波波池唔單止吸引小朋友,就連大人都被深深吸引住,我都想快啲跳落去感受一下呀!*o*


咪咁心急住!坐低飲啖水,叫埋嘢食先啦!呵呵!~

等待食物期間,衝呀!去反轉波波池囉!~~


大樹先生開張以來已經轉過幾次波波顏色,一向覺得藍色最好睇,但原來轉紫色效果都唔錯。鮮花之中,毋忘我係我最喜愛嘅襯花之一。加啲幻想,感覺就好似跌咗落去毋忘我花海之中,鬆弛愉快嘅感覺隨住晴晴嘅笑聲飄散於空氣中,好舒服喔~


今次波波池多咗個大型飲品裝置,考考眼界先!我~ hey~~ 中呀!Yeah!!!


晴晴唔知響邊度搵嚟一支巨型牙刷,話要用呢支牙刷嚟刷牙喎!咁又笑咗一大餐!XDD


牆身貼上咗新設計,離遠仲以為個時鐘可以調較嘅添!原來只屬佈景,做得好逼真呢~

大鬧完波波池之後,不如去玩下玩具囉!


扮靚係女仔嘅天性嚟嘅!化妝、 set頭後可以換埋合適嘅服裝喎!隔離有多款服飾任君選擇~


晴晴一向比較鍾意玩男仔嘢!公主裙、皇冠果啲唔係太啱佢,結果戴上captain帽已經好開心喇!^^


跟住玩一陣樂器、同布偶傾一陣計,玩多陣啲嘢食就上晒枱喇!中場休息先~


有冇發現一直玩都唔見咗朗朗呢?對於7歲半嘅朗朗嚟講,見到呢個牌可能會有點兒失望啊!~.~''

不過唔緊要啦!食餐勁嘅補番數~


嘩!睇到口水都流喇!唔講咁多,開餐囉喂!~ ^o^


安格斯牛肉芝士漢堡 - 提防小手!開始食嘅時候,會發現有兩隻小手不停偷食薯條,賊仔呀!不過啲薯條啱啱炸起熱辣辣,的確好味!咸味恰到好處,唔點茄汁已經好夠味。新鮮沙律菜配埋黑醋咁食,酸酸哋幾開胃。朗朗有西瓜王子之稱,啲西瓜當然唔夠佢搶啦!我都唔執輸,下面啲菠蘿全部係我嘅!我發覺食物係要一齊爭下先食得開心!XD 重頭戲當然係個灘堡啦!淨係睇塊芝士厚厚咁溶晒嘅樣已經夠晒吸引!


塊安格斯牛肉入口嘅肉汁簡直唔講得笑,認真覺得平時食開嘅M記果啲重量級滋味只屬碎料,呢個漢堡真係好有驚喜!強烈推介!


南瓜忌廉汁義大利粉配照燒雞扒 - 雞扒個燒汁好入味,而且肉質嫰滑,加埋美味嘅南瓜忌廉汁,成件事變得好完美。晴晴不停叫好味!我冇誇張,好難得見到佢食得咁快,證明咗係幾咁好味!我都好鍾意呢個配搭同味道,創新得嚟又配合得好好,大家一定要試埋呢款呀!


意式茄蓉雜菜義大利飯 - 雜菜足料!茄蓉令到成個飯都好creamy,幾啱小朋友口味!不過晴朗媽媽較為喜歡白汁配意大利飯,所以呢款食得比較少,益晒晴朗囉!^o^


紫薯特飲 - 呢款新飲品好襯紫色波波池呀!顧名思義就係紫色蕃薯+奶嘅飲品嚟啦!紫薯味出,奶味重,味道唔太甜,唔只小朋友鍾意,我都好鍾意。呢種味,應該都啱我奶奶同媽咪飲,為迎合母親節主題而特別調製出啱媽媽口味,大樹認真勁呀!


有得食個個都開心啦!睇嚟朗朗都食得好滿足,已經忘記咗冇得入遊戲區嘅事喇!XD

晴晴今餐真係食得特別快!食飽又去玩過囉!gogogo~~


搖身一變,變成為小農夫,而且遇著大豐收添喎!


收穫豐富,當然要攞去賣,換來金錢再去high tea啦!埋嚟睇埋嚟揀喇喂!~


嚟嚟嚟!預備我哋嘅high tea喇!不過事前要自己落手落腳整喎!晴晴一樣樂在其中~


晴晴為我預備嘅下午茶,好精美喔!我唔客氣喇!^^


嘆過high tea後,就去玩晴晴至鍾意嘅沙,平時少去沙灘嘅我哋,每次到大樹先生必定會入沙池玩上好一段時間~


女仔始終都係鍾意玩下女仔嘢!將間屋佈置得靚靚,都好考耐性同創意㗎!


然後又繼續high tea去!今次啲食物豐富咗好多,女仔喜愛甜吃係ok嘅!不過要小心食到有個肥肚腩喎!XD


剩餘10分鐘嘅玩樂時間,晴晴把握最後機會,再到波波池享樂一番,玩到忘晒形~


響工作人員提醒夠鐘之下,只好難捨難離咁離開波波池啦!~.~'''


既然咁鍾意啲波波,就帶埋番屋企囉!仔細一看,原來每個波上都印有「大樹」二字,果然係品質嘅保證~


大樹先生開店至今,原來都陪伴咗晴朗一段好長嘅日子。由細玩到大,去到現在,晴晴拼埋去其他小朋友度顯得好大個。距離7歲都仲有大半年時間,要好好把握機會再嚟玩先得喇!^^

我哋到大樹先生的家玩已經唔係第一次,見到佢哋啲食物越來越有進步,真係食得好滿足呀!最欣賞係佢哋對衞生標準嘅講究,幾個月又換一次波波,原來要填滿整個波波池係需要5萬個波波,好震撼!而家大樹先生的家做緊優惠,大家有興趣不妨去呢個網頁度訂購優惠啦!
https://m.wingontravel.com/food/detail-1006

為慶祝母親節,大樹先生的家由5月2日至5月31日會推出一系列驚喜活動,仲會為媽媽們送上美味macaroon添!詳情請留意大樹先生的家facebook專頁啊!

紫色真係好襯母親節,至少我、我奶奶同媽咪都係咁鍾意紫色。大家都快啲安排帶埋媽咪同小朋友一齊嚟到大樹先生玩,共渡難忘溫馨時光啦!預祝各位母親節快樂!Happy Mother's Day!!!


大樹先生Mr. Tree」香港店
地址:荔枝角長順街D2 Place Tow 1樓106-107 & 120-121室
訂座電話:31840033
facebook:https://www.facebook.com/Mr.Tree38HK


FIND US on:
  "  "   

BLOGs:

 

CONTACT US:

發表於2018.4.24
留言(0)
博客名稱 :
晴朗媽媽
網誌名稱:
晴朗天 - 食·玩·育·美·愛の親子平台
使用天數:822
年齡:2
電郵:chinglongtin@gmail.com
按月份瀏覽
    2018
  • 一月
  • 二月
  • 三月
  • 四月
  • 五月
  • 六月
  • 七月
  • 八月
    2017
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 生活品味
  • 電影戲劇
  • 攝影寫真
  • 其他
  • 財經生活