04
01.2018

【親子好去處】禾田喜山種植園 Wadakiyama

環球旅遊   親子育兒(旅遊)   生活品味  

聽說沙頭角這邊又多了一個農莊(其實是種植園),所以今個聖誕假就預約了到這個叫「禾田喜山」的種植園玩玩。「禾田」是因為這裡後山是一個梯田(梯田就是用作種植稻米),「喜山」就是負責人 Thomas 希望這個山頭能為大家帶來「歡樂」 ,因此就叫作「禾田喜山」。

 

 


我在較早時侯在網上Google Form預約了今天的參觀,現時設有10:30及13:30兩節到訪時段,而且為了保持園內體驗質素,設了每天上限100人入場。

 

我哋今日乘坐MTR由九龍塘到粉嶺,然後再轉乘的士($70)到塘肚村落車,大約只需用1小時多的時間,大家當然也可以在上水或粉嶺站坐 55K小巴 或者 78K巴士,於塘肚站落車,只係因為我哋前一晚較夜瞓,想小朋友早上多瞓一陣,所以先轉乘的士。

 

本人經驗建議搭小巴較好,因為巴士20-30分鐘一班,而且中途都好多個站可能需要半個鐘頭以上先到。

 


現時「禾田喜山種植園」仍在試業階段,負責人 Thomas 希望在這段時間內聽取更多不同意見,去作出更合適的改變及安排去回應客人的需要。今次前來預約時,已經跟它11月中試業時有很大的轉變。


一落車大家唔會見到任何「禾田喜山」的招牌,只會見到沙頭角農莊的大招牌

 


不過在「禾田喜山」的Facebook專頁已經有相有片咁教大家前來,而且在這個大招牌轉個彎,就會見到停車場「禾田喜山種植園集合處」的牌

 

 

 

 

 

差唔多時間就會有職員出嚟帶大家入去,可能你會問點解要咁轉折穿過「沙頭角農莊」先可以去到「禾田喜山種植園」?其實本身在村中有另一條小路直接行入「禾田喜山種植園」,但係因為村民不滿,而且怕有惡犬,所以暫以「友好」關係跟「沙頭角農莊」合作,借它們的路入場,同樣它們的水耕種植場也歡迎「沙頭角農莊」的遊客免費參觀

 


剛好今日途中「沙頭角農莊」是日休息,經過它們的「火車博物館」及「招財貓館」,甚少到呢個地方,一於打個咭先!

 

 

 

 

 

 

 

 

由剛才集合點行入嚟大概只需10分鐘路程,過埋呢條小橋,離遠就望見「禾田喜山」的入口

 


唔知點解,見到「禾田喜山」四隻字就係覺得好有日本風,兩個亦擺出一副跆拳道姿勢去影相

 

 

$40 入場費已包括購買一包洛神花茶及2張面值$10的遊戲券

 

滑草(3分鐘):3張遊戲券;

彈床(5分鐘):2張遊戲券;

沙池繩網(55分鐘):1張遊戲券

 

,然後貼上貼紙及戴上入場手帶,這個3個小孩的爸爸 Thomas 親自出來迎接各位,跟每位入場朋友講解一番及派發茶包遊戲券,真係親力親為,值得一讚。

 


還很感恩今天剛好「沙頭角農莊」休息,如果唔係那邊的人也可過來玩的話,就不堪設想了。因此今日天氣不錯,早上這個時段人也不多,玩得也舒服。


雖說是25萬呎,但大部份都用作水耕種植場及菇菌培植場,玩的真係一眼睇哂,最多傳媒報導的就係呢個滑草場

 


其餘的就只有這個沙池繩網區

 


及這個跳彈床區

 


大家如果要玩,就先要到這裡,用你手上的面值$10遊戲券,來這裡換取屬於該項活動的入場券


例如你需要現在去滑草,那就用三張面$10遊戲券去換取一張滑草券;去跳彈床就可用兩張遊戲券去換取彈床券


今日我哋一家四口嚟玩,所以入場時後持有八張遊戲券,我哋先去前枱用四張換取兩張彈床券(因為那時剛入場,大家同時湧去滑草,超級多人排隊)

 


相反彈床區一個人也沒有,兩兄妹包了整張彈床玩

 

 


雖然話係得5分鐘,但係職員哥哥都好好人,如果冇咩人都會俾大家跳多陣,或者遲少少先開始計時。不過5分鐘話短唔短,未夠鐘時兩個都已經跳到冇哂力...所以5分鐘認真嚟講都足夠

 

 

 


謝了...

還有一旦開始計時,就唔會再俾後來的小朋友加入,直至完整跳完一節,先再到其他人玩

 

 

玩完跳彈床,本想過去滑草,但眼見仍然有很多人,所以我哋又轉移陣地到沙池玩玩。呢度只需一張遊戲券就可以換取沙池券,而且可以玩成個鐘,絕對超值!不過其實沙池區都有酌情權,若人數唔多嘅時侯,其實都唔會太過強制小朋友要一次過玩成粒鐘,即使離開沙池後再番回入場也是可以的!

 

 

 

 

 

呢個繩網都幾有挑戰性,絕對可以訓練到大小肌肉

 


當大家仍在排隊滑草,彈床區又開始多人玩時,呢兩兄妹又再一次包場式玩盡各繩網跟沙池

 

 

 

 


由於沙池中有不少沙石,所以我都建議大家叫小朋友唔好除鞋玩,而且赤腳去玩繩網對腳板都幾痛㗎!

 

 

 

 

呀芊要行過呢個繩網都用上2-3分鐘時間,相反呢個哥哥一上網就轉眼到達終點,我影相都嚟唔切

 


唯有叫佢玩多次嚟影吓相 (因為佢不大感興趣,只想快快落沙玩)

 

 


仲有一排彩虹車呔,可以逐個拎出嚟玩,又或者好似哥哥咁當佢山窿捐

 

 

 

 

玩了一段時間,我發現滑草場終於一個人也沒有,看似大家都已被滑草耗盡了遊戲券,所以我哋就最後先過去玩。

 

 

沙池旁邊可以洗手超方便,整頓好就出發過滑草場區了。滑草需要三張遊戲券去換取,我哋頭先玩過彈床及沙池,只剩下兩張遊戲券,所以我哋到小賣站補貼$40換取兩張滑草券

 


呢個滑草場雖然用上真草,不過斜度長度都唔夠,但係又不得不提及呢架滑草車,佢係用上履帶移動 (即好似坦克車咁),滑起上嚟會加快速度,而且相比起滑草板來得更安全。


當然有利也必有弊,當每次滑下去後,要拖上來也相對重了些,呀芊又唔夠力拉,哥哥就冇咩問題 (對爸爸嚟講,當然不成問題)


其實三張遊戲券 玩一次 (即$30玩3分鐘) 聽起來個個都話貴,如果以一個正常媽媽嚟講,再快手也只不過可以跟小朋友玩4次,重複四個步驟 


1.推 → 2. 追 → 3. 影 → 4. 拉


其實3分鐘都真係夠皮


各就各位,小朋友戴上衞生頭套,然後再戴上頭盔。

 

 

 


呢個就係剛才我所講的


1.推 

 

 

2. 追 及 3. 影

 

 

4. 拉 (幸好哥哥可以自己拉,妹妹那架是我拉)

 

 

 

 

 

 

慢慢哥哥開始自己顧掂自己,媽咪負責推,我負責拍跟拉妹妹的滑草車,相信玩多幾轉等於做咗一日GYM

 

 

 

3分鐘話咁快就過咗,同樣少人的時侯,如果你瀡咗落去時夠鐘的話,職員都會俾小朋友拉埋上嚟玩埋最後一次

 

不過兩個當然玩一次唔夠喉,所以我哋再到小賣部俾 $60(2人) 玩多次

 

 

 

爸媽們為咗善用$30一次滑草時間,不惜三分鐘又落又上,希望可以限時來讓小朋友玩得最多次數,但係咁玩法爸媽們都已經累透。不過我覺得咁樣玩法,又失去咗呢度原本想為人帶來舒適自在環境的意義。

 

我明白種植園還在試業階段,正尋找更合適的方法去款待大家,我自己都提供咗幾個方法俾 Thomas,佢應承我農曆年過後會檢討一下,更新現有遊戲規則及增設更多設施,希望下次再嚟可以更舒服自在咁玩。

 

(講個秘密大家知,我已經知道出年新增咩設施啦!但係要賣個關子...好期待)

 

 

話說回來,大家可能睇到呢度會覺得好少嘢玩,咁仲值唔值得入嚟呢?確實,我早上10:30到,玩過園內三項設施後,大概用了一個小時到11:30。不過園內仲有「水耕種植導賞」,分別係12:00及14:30兩場,然後到15:00還有一場「蜜蜂生態導賞」,其餘時間還可到大草地玩,其實也頗充實。

 


距離「水耕種植導賞」仲有少少時間,我哋就在周圍附近影影相。

 

 

呢兩個一紅一藍大風車,是「禾田喜山」的地標,不過在另一個農場也有相似的。

 

 

 

 

 

 

打過咭後,還有少許時間才開始水耕導賞,我哋去咗小賣部買咗兩架飛機玩具到大草地自在咁玩

 

 

小賣部除咗有多款玩具,都有各款飲品,波仔飯及杯麵等,價錢都相宜唔算太貴,以杯麵為例,一個只係$10都算OK啦

 

 

去到滑草場旁邊的大草地玩飛機,都有其他小朋友喺度玩集體遊戲、吹泡泡、放風箏等

 

 

 

 

 

 

 

喺呢個草地上仲種咗好多洛神花、怕醜草同埋牽牛花

 

 

 

 

 

 

 


好快就到12點正,水耕導賞開始啦,職員哥哥先給大家試食「羽衣甘藍」,原來都好好食,少少甘甘地,苦苦地,但係食落又OK接受到,不過真係好香好Fresh!原來「羽衣甘藍」仲有助抗癌、預防糖尿病、心臟病等好處。

 

 

 

 

我哋進入水耕種植場參觀,職員哥哥一邊介紹蔬菜一邊玩有獎問答遊戲,答啱咗就送手上的蔬果俾大家,令大人細路都好開心。

 

 

其中一條問題問點解樹葉上面有條白色粗粗的痕跡,全場連大人都答不到的問題,居然呢個哥哥記得上次嫲嫲講過,這是昆蟲行過的痕跡,於是就獲得一條水耕種出嚟的青瓜

 

 

 

 

 

兩個不停試摘不同款式的水耕菜入口試試味

 

 

車厘茄都有,又係哥哥答中問題得到的!今次只係贏在舉手快,哈哈~

 

 

 

 

參觀完一出嚟就係巿集,大家可以買番D農作物番屋企

 


特別要介紹呢支「叁和茶」,呀姨話如果係「熱」咳的話,真係好大幫助,而且最重要係只賣$5,飲落好舒服仲有回甘幾好飲!

 

 

 

大約12:30就到食晏晝飯時間,較早預約填網上報名表時,我哋已經訂購咗飯盒,款式唔算多,只有4款,但係都熱辣辣大大盒好好味。

 

再加埋頭先答問題得的青瓜及車厘茄,食得特別滋味!兩個快快手食完又即刻走咗去草地玩 lu...

 

 

 

 

每盒飯都會包埋一罐飲品

 

 

兩個又走番去沙池玩,仲專登走過嚟嗌我去望佢哋挖好咗個沙堆影相

 

 

 

 

因為大家都走咗去滑草同食飯,又再一次包場玩沙池。橫豎睇都影唔出三個沙堆有咩分別

 


食完飯呢段時間真係幾悠閒,因為到3:00先至有「小蜜蜂生態導賞」,所以差唔多有1小時30分鐘俾佢哋玩,我哋就成機休息下,我坐喺搖搖椅度瞓咗成粒鐘,好舒服呀!

 

 

之後到「小蜜蜂生態導賞」,由 Thomas 爸爸親自帶隊,有多個蜜蜂箱,仲記得細細個小學時侯參觀過寶蜂園,嗰陣俾蜜蜂針過一次差D冇命

 

 

 

 

當 Thomas 爸爸將個蜜蜂格拎出嚟,小朋友見到咁多蜜蜂即刻超興奮

 

 

大家只係對蜂后好有興趣,一味喺度周圍搵隻蜂后,但係邊有咁易俾你見到。仲有原來所有工蜂都係䧳性嚟㗎喎,蜜蜂的性別仲要係取決於蜂后,Thomas 爸爸話睇蜂后心情㗎咋,個精囊喺蜂后度,佢想幾時要雄性就雄性,䧳性就䧳性

 

 

最後我哋仲拎住個籃,入去水耕種植場摘菜呀

 

 

 

菜心、白菜仔、芥菜咩都有!$50一籃,睇你摘到幾多,裝得滿滿!(暫時只接受 團體朋友進場採摘)

 

 

 

親手採摘完番到屋企煮嚟食,小朋友都食得多D

 

 

 

 

 

 

 

 

 

最後玩到4:30,我哋就行番出去搭車番出去轉東鐵,依家巴士比較耐一班,相反小巴就大約5分鐘一班,不過好多都滿座,但係過咗幾班後,有一架全吉的到站,大家都上到車

 

 

 

 

 

如果上車前有D時間唔趕住走,仲可以落去沙頭角農莊這邊打打咭先走

 

 

 

 

 

 

 

 

 

 

 

 

 

 

 

Photo by CANON 5D Mark IV, Len | EF 24-70mm f/2.8L USM


想跟我去體驗其他活動,快D報名親子團,同埋留意專頁公佈詳情啦!

http://goo.gl/forms/CNZMEPoMIWkouK8o2

 

呀劍評分: 10分

 

呀劍評語: 種植園的設施完善,洗手間也乾淨,職員態度非常親友善親切,雖然遊玩點暫時不多,但配合導賞服務也來得充實,也有一點悠閒空間給大家,毋須跑景點排長龍玩!

 

禾田喜山種植園 簡介

這農地原本購入的目的是為了給爸爸退休消遣之用,因為兩父子都愛水耕種植,也注重食物安全和衛生,因此想擁有一塊自耕地。但 Thomas 認為此農地不止於此,令本身喜愛滑雪的Thomas 衍生了滑草車的念頭,再配合其他設施,希望能做到一個充滿親子及歷奇活動的種植園。


地點

塘肚坪村沙頭角公路石涌凹段


營業時間

0900-1700


收費

$40 可獲一包洛神花茶及遊戲券2張

3歲以下小朋友豁免


交通

可於上水港鐵站乘坐55K專線小巴或78K巴士,於塘肚站下車後步行5分鐘


查詢及預約

6010 5978

 

(以上資料更新至文章當日)

 

 

Facebook專頁: 呀劍萬帥 kimfamilytravel

 

Blog網誌 : www.kimfamilytravel.com

 

 

發表於2018.1.04
留言(0)
博客名稱 :
呀劍萬帥
網誌名稱:
呀劍萬帥 • 親子旅遊 • 攝影札記
使用天數:918
年齡:2
電郵:kimfamilytravel@yahoo.com.hk
按月份瀏覽
    2018
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
    2017
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 數碼科技
  • 生活品味
  • 藝文創作
  • 電影戲劇
  • 寵物日誌
  • 攝影寫真
  • 戀愛心情
  • 文化政經
  • 其他
  • 台灣館
自行分類